آنا ديلي - عليرضا ذيحق

بو نغمه لر له جوشوب داشسا دا طبيعت قوينوندا بوي آتيب دير چه لن گونلري يادينا دوشوردي و ديزه چيخان لاله لر ايچره ، قيز گلين لر له اَ ل اَ له وئريب " يولوم دا دورما اوغلان . منه هردن سؤز آتيب اؤزونو يورما اوغلان !" دئيه رك ديل لردن دوشمه يه ن ماهني لاري خاطير لاييردي. داها او سؤز قوشان ديلي ، ديليم ديليم اولما سا دا ديندير مه يينجه دينمه يه ديلي گلميردي. لال اولما سادا سانكي چوخدان ايدي ديلي آليشيب يانميش دي. اوخويوب يازما قي آنا ديل ده اؤيره نمه ديگي اوچون ، كؤنلون دن چاغلايان يوزلرجه نغمه جالانيب دوداقينا آخما دان ، آغ گؤير چين  لرين گوج له تيكانلي سيم لره دَييب دينمه دن جان وئرمك لري كيمي ، بوتون هيچقيرتي لاري تكجه بير آها چئوريليردي. آجيدان بير آه كي هاراي اولمادان ، ياش اولوب گؤزلر دن و قان اولوب سينه لر دن آخيردي. بونا گؤره ده اؤيره نميشدي كي باشيني ساخلاماقا ديليني ساخلا ما ليدي و گرك دي كي گاهدان ، ديل ده بير شئي دئييب اوره ك ده باشقاسيني توتا .
دونن آمما قونشوسو ، اونون بوتون رويالارين پوزاراق  دونيا سيني باشينا ييخميشدي. او " قو رخما دالي قالماز " دييه اونو ، جان جيگه ري اولان اوشاقينان آنا ديل ده  دانيشما قينا خاطير شماتت ائتميشدي . او اؤلكه نين رسمي ديليجه  اوشاقلارين ديل آچيب بؤيو مه سين ايسته ركن بودا ايكي ديللي قالاراق نه دييه جه گينه تومموشدي. آنجاق ديلينه تكجه بير سؤز گلميشدي اودا بوكي " اؤز ديليم دي شيرين ديليم دي". كيم نه دئيير سه دئسين اوگرك ايدي كي بو گون دن دينمز ليگيني قوروياردي. داش لار ديله گلسه ده اودينمه مه لي ايدي. آناسي نين دا  آمما بو سؤزونو اونودانميردي كي هئي دييه ردي : " دئديم دينمه آي ديليم . دئدي دينمز ايديم ، دينديرديلر دينديم من ! "
قوش يوخولو جئيران بالاسيني ياتا قينا قويدوقدا ، پَنجَره يه ساري گئديب ديشاري يا باخاركن ، گؤز ايشله ديكجه گؤيه ايشله يَن دام داش لار گؤردو . بير داها دا  گؤ ي اوزه ريني آختاردي و بو آختاريش دا توتقون لوق گؤرسه ده تكجه بير قوش دا گؤره نمه دي. قوشلاري دوشوندو و باغ باغاتي و ديليندن دوشمه ين سئويملي نغمه لري اوخودوقجا قوشلارين دا ديله گلمه سيني .چمن لري گزه رك عطيرلي گول لرين درمه سيني خاطيرلادي و هر قوشون اؤزونه عاييد شيرين – شيرين چه چَهيني .هم ده هر قوشون آزادليق لا اؤز نغمه سي نن جوشما سيني . آمما ندنسه اينسانلار چوخ يئرده ، ديل آچيب ديله گلمه دن ، ديل لري باغلي و قلم لري سينيق اولورو مكتب سيز كيتاب ياشاما قا مجبور قاليرلار . ياد ديل لرده يازيب پوزماق اونلارين تكجه شانسي اولا راق اوزگون لوك ده كؤنول لريني اوزور . نييه كي ديل اوره گين آچاري اولسادا، هر ديل له هر قيفيلي آچماق اولماز . ديل اَت دن دير و هايانا دؤنده رسن دؤنر آمما آدام كي فقط اَت دئييل  سوموك دئييل بلكه هم روح دور هم دويغو و هم ده لاپ چوخ ، سئوگي ايله  عاطيفه .
او اَليني ياناقدا كي قوشا خالينا آپاريب بارماق دا كي قيزيل اوزوگه باخاركن " نه شيرين دير يارين جاني " دئيير و سئوگيلي سي نين شيرين ديل لريني خاطيرلاياراق نازلانا – نازلانا كؤرپه ماراليني قوجاقينا آلير . بوتون داغلار چيچه گي نين قوخوسو جانينا ايشله ركن اونو اؤپوري و اونا هئچ ده اولما سا بير قوش قَدَر سعادت آرزولايير .
 گله جه گي خياليندا قوراراق اونون دوغما ديل ده ديل آچماسيني گؤروري و حيات بختي نين ايگيدي ، سئويملي ياري نين آياق سس لريني دويور كي سارسيلماز ايراده ايله ، اَمه گيندن و تلا شيندان قازانديقي حلال چؤره ك له قاپي يا ياخينلاشير .
هاوا توتقون اولسادا ، كؤنلو هله آچيق ايدي و اونون صاف ليغيني توزلار دومانلار هله بولانديرما ميشدي . فيكر ائديردي كي ديل ايله زور ايله اولماز و هامي ديل بير اولور سا ، هاراي لاري گؤي دَلَن تيكينتي لر دن ده يوكسك اولار . او قَدَر يوكسك كي اوزاق دا كي قوشلار  دا هاي لارينا هاي وئره ر لر ونغمه لري ، دييار – دييار لاله اولوب يئر اوزونو بَزه يَر لر. او داها قونشوسونو يوخ ، كؤنلون ده كي فرماني دينله ييردي و سئوگيلي سي ، ائوين قاپي سيني آچاراق  كؤلگه سي گول اولوب ،گول اوستونه گول دوشور .



  • [ ]