ترك شناسي

فئورال آيي نين 21 - اينجي گونو، دونيا آنا ديلي گونو، بوتون آزربايجان خالقينا و اؤزلليكله بو يولدا اميي اولانلارا و چاليشانلارا، قوتلو و اوغورلو اولسون.

پروفسور دوكتور محمد تقي زهتابي (كيريشچي) نين بير گؤزل شئعيري ايله بو گونو قوتلورام و ياخين گله جك ده، بو يولدا بؤيوك باشاريلار ديله يرم....

سو دئييب دير منه اولده آنام

"سو" دئييب دير منه اولده آنام، آب كي يوخ

                                    "يوخو" اؤيرتدي اوشاقليقدا منه، خواب كي يوخ

ايلك دفعه كي "چؤرك" وئردي منه، نان دئمه دي

                                     ازليندن منه "دوزدانه"، نمكدان  دئمه دي

آنام، اختر دئمه ييب دير منه، "اولدوز " دئييب او

                                     سو دوناندا، دئمه ييب يخ دي بالا، "بوز" دئييب او

"قار" دئييب، برف دئمه ييب، دست دئمه ييب، "ال" دئييب او

                                    منه هئچ واخت بيا سؤيله مه ييب، "گل" دئييب او

ياخشي خاطيرلاييرام، ياز گونو آخشام چاغي لار

                                     باغچانين گون باتانيندا كي، ايليق گون ياييلار

گل دئيه ردي، داراييم باشيني، اي نازلي بالام!

                                     گلمه سن گر، باجينين آستاجا زولفون دارارام

او دئمه زدي كي، بيا شانه زنم بر سر تو

                                    گر نيايي بزنم شانه، سر خواهر تو

بلي، داش ياغسادا گؤيدن، سن او سان من ده بويام

                                  وار سنين باشقا آنان، واردي منيم باشقا آنام

اؤزومه مخصوص اولان باشقا ائليم واردي منيم

                                 ائليمه مخصوص اولان باشقا ديليم واردي منيم

ايسته سن قارداش اولاق، بير ياشاياق، بيرليك ائدك

                                  وئريبن قول-قولا، بوندان سورا بير يولدا گئدك

اولا، اوزگه كولك لرله گرك آخماياسان 

                                  ثانيا، وارليغيما، خالقيما خور باخماياسان

يوخسا گر زور دئيه سن ملتيمي خوار ائده سن

                                   گون گلر، صفحه چونر، مجبور اولارسان گئده سن

ياشاسين آزربايجان